Átakið 2008

27. júní 2008

Fri, 27 Jun 2008 13:46:43 GMT

Jæja, það gengur allt bara mjög vel hjá mér núna, er búin að skrá mig á námskeið í ræktinni og fer svo eitthvað líka í einkaþjálfun og mataræðið gengur vel :haha:
Vildi bara láta ykkur vita af þessu, læt heyra í mér fljótlega aftur

17. júní 2008

Tue, 17 Jun 2008 20:47:38 GMT

Jæja, það hefur gengið svona sæmilega hjá mér, er reyndar voðalega pirruð þessa dagana og vorkenni sjálfri mér alveg heil ósköp að geta ekki farið og fengið mér ís í góða veðrinu eða nammi á kvöldin. Ég fór ekki alveg eftir settum reglum í gær og í dag og er ekki stolt af mér fyrir það, þetta var samt ekkert hrikalegt svindl, datt ekkert í nammipokann eða slíkt en borðaði mat sem ég má ekki borða samkvæmt því mataræði sem ég er að fylgja.
Þetta er erfitt en ég verð að halda áfram, því ef ég gefst upp núna þá held ég að ég sé búin að reyna allt og hef ekki fleiri lausnir, þessi lausn verður því að ganga upp.

14. júní 2008

Sat, 14 Jun 2008 10:14:46 GMT

Jæja, það gengur bara nokkuð vel hjá mér. Hef verið að fara alveg eftir mataræðinu en það hefur verið erfitt. Var rosalega pirruð í gær og langaði bara að hætta þessu og fá mér það sem mig langaði í en ég gerði það sem betur fer ekki.
Ég verð bara að halda þetta út lengur, annars dett ég bara í sukkið aftur.
En vildi bara láta ykkur vita hvernig gengi, læt heyra í mér fljótlega aftur :)

11. júní 2008

Wed, 11 Jun 2008 19:34:16 GMT

Jæja þá er annar dagurinn minn í GSA að klárast og þetta gengur bara vel.
Hef ekki haft neina löngun í óhollustu sem mér finnst bara alveg frábært.
Ég fór svo í ræktina bæði í gær og í dag, lyfti hendur í gær og brenndi í dag.
Ég setti inn nýjar tölur, ég bjóst nú við að vigtin færi hærra miðað við allt sem ég hafði innbyrt undanfarnar vikur en hún fór samt alveg nógu hátt, nú er það bara að ná þessu niður, ég vona að þetta gangi allt saman upp, það eru alla vega komnir tveir dagar :d
En það koma ekki inn nýjar tölur fyrr en 10. júlí, hér eftir verður bara vigtun einu sinni í mánuði.
Ég læt þetta vera gott í bili, ég leyfi ykkur að fylgjast með hvernig gengur.

9. júní 2008

Mon, 09 Jun 2008 19:45:28 GMT

Eins og líklega allir hafa tekið eftir þá hef ég ekki verið dugleg að blogga og það sama má segja um mataræðið. Hef ekki haft neina stjórn á þessu, er ábyggilega eins og versti alkóhólisti nema ég sukka í mat og nammi.
Það sem ég hef látið ofan í mig síðustu vikur er gífurlegt magn af óhollustu og líður mér alls ekki vel með þetta.
Ég fór í seinustu viku á fund hjá GSA eftir að hafa lesið mér til á síðunni þeirra og hef ákveðið að prófa þetta og ég vona svo sannarlega að þetta geti hjálpað mér því ef þetta gengur ekki þá veit ég hreinlega ekki hvað gerir það.
Ég er komin með æðislegan sponsor og ætla að taka þessu með opnum huga og hef ákveðið að gefa mig alla í þetta, það tekur líklega einhvern tíma að venjast þessu og ég ætla að gefa mér mánuð í að venjast þessu.
Ég hef einnig ákveðið að verðlauna mig og það verður ekki eftir kílóum heldur eftir dagafjöldanum sem ég hef verið í fráhaldi eins og það er kallað þegar maður heldur sig frá þessum óholla mat.
Ég byrja á þessu prógrami á morgun og þegar ég hef náð tveimur vikum í þessu þá ætla ég að leyfa mér að fara í litun og klippingu (þarf að fara í litun núna en ætla ekki að leyfa mér það fyrr en ég hef náð þessum tveimur vikum)
Ég hef ekki þorað að stíga á vigtina í nokkurn tíma en ég veit að hún hefur farið eitthvað upp. Ég ætla að vigta mig í fyrramálið og set inn tölu þá.
Þið megið endilega fylgjast með þessu hjá mér og þið megið endilega láta mig vita í comments, það hjálpar helling að vita af ykkur að fylgjast með mér :d

15. maí

Thu, 15 May 2008 17:08:15 GMT

Jæja, betra seint en aldrei :d Það gengur bara vel hjá mér, seinasta helgi fór reyndar í smá sukk en ég er búin að ákveða að það er leyfilegt að fá sér einstaka sinnum eitthvað gott, ég ætla að nota laugardaginn í það en ef ég er td að fara í veislu eða eitthvað slíkt þá færi ég daginn og fæ mér þá ekki á laugardeginum. En ég setti nú ekki tölur seinasta fimmtudag en vigtin stóð í stað þessa vikuna og ég er bara mjög ánægð með það miðað við það sem ég fékk mér um seinustu helgi. En ég er búin að vera mjög dugleg í ræktinni og fyrstu vikuna fóru 2.9 kg og staðan var eins í morgun, þannig að nú stendur vigtin í 99.1, svo er bara að halda áfram. Baráttukveðjur til ykkar allra ;)

Nýjar tölur loksins

Sat, 03 May 2008 22:30:12 GMT

Jæja, vigtin búin að fara aðeins upp, bjóst nú reyndar við miklu stærra skrefi uppá við en hér eftir á hún bara að fara niður á við :d
Ég er búin að vera dugleg í ræktinni og mataræðinu, vona bara að vigtin fari eitthvað niður, stefni á kíló á viku :)

1. runninn upp

Thu, 01 May 2008 13:07:36 GMT

Jæja þá hefst þetta aftur. Núna verður sko tekið á því, ekkert rugl. Ég fór í ræktina í morgun og tók vel á því. Núna er bara að taka mataræðið í gegn. Ég er ekki alveg búin að ákveða hvernig ég hef þetta með nammidagana en ég ætla að sjá til, ef ég fæ mér ekkert nammi, spring ég þá á endanum og dett í'ða eða ef ég hef nammidag einu sinni í viku ét ég þá mörg kíló þann daginn. Auðvitað á ég að geta stjórnað þessu alveg sjálf, það er ég sem ét þetta og það er ég sem kaupi þetta en stundum er bara svo erfitt að stjórna þessu en núna verður tekinn einn dagur í einu og vonandi verður hægt að fara í verslunarferð eitthvað út fyrir jólin og verðlauna sig fyrir góðan árangur, það er stefnan. Til að byrja með ætla ég að setja það markmið að eftir viku verði farið 1. kíló. Reyndar get ég ekki sett tölu inn í dag þar sem vigtin mín kveikir ekki á sér :klikk: En ég vigtaði mig í ræktinni í morgun, ætla svo að vigta mig aftur þar á morgun og vigta mig líka á minni vigt á morgun, þá sé ég hverju munar og veit hvað ég var þung á vigtinni minni í morgun :d Þá læt ég ykkur vita töluna. Gangi ykkur öllum vel, þetta er hægt þó stundum virðist maður alveg stopp.

jæja

Sat, 12 Apr 2008 00:39:19 GMT

Ætli það séu einhverjir sem stoppi á þessari síðu lengur, hef ekki verið sú duglegasta að blogga.
En ég ætla að taka smá pásu, kem sterk inn aftur 1. maí, fylgist með ;)

Bloggleysi á enda

Thu, 03 Apr 2008 21:31:14 GMT

Þetta bloggleysi gengur nú ekki, afsakið þetta. Seinasta vika gekk nú ekki sem skildi en þessi vika sem nú er að líða hefur gengið vel, Hef verið dugleg í ræktinni og mataræðinu. Ég tek bara einn dag í einu og hugsa auðvitað hvernig útkoman verði ef allir dagarnir ganga vel, ég á gallapils inní skáp sem ég get hneppt en bumban vellur yfir, ekki smart, hlakka til þegar ég get verið flott í pilsinu mínu. Baráttukveðjur til ykkar allra sem eru í átaki.
Ég gleymdi að vigta mig seinasta mánudag, ákvað því að vigta mig bara næsta mánudag :haha:

Páskarnir búnir

Tue, 25 Mar 2008 13:57:44 GMT

Jæja þá eru páskarnir búnir og ég get ekki verið mjög stolt af áti mínu yfir hátíðina. Fór 3 kvöld í röð í steikur og meðlæti. Ég fékk mér páskaegg og ís á páskadag og annan í páskum fékk ég mér hamborgara, franskar, lítinn bragðaref og kók.
Ég er ekki sátt með þetta en það þýðir ekkert annað en að drífa sig upp úr þessu og hrista þetta af sér. Ætla að fara í ræktina á eftir og taka vel á því og það verður sko ekkert sukk.
En þar sem ég er búin að svindla þá skulda ég víst einhverjum pening, ætla að borga 2x 500 kr, tvær fyrstu manneskjurnar sem senda mér póst á atakid2008@visir.is frá sitthvort 500 kr.

Nýjar tölur

Tue, 18 Mar 2008 00:23:03 GMT

Jæja þá er vika nr 2 liðin og þetta gengur bara vel. Er reyndar búin að vera í smá svartsýniskasti í dag og finnst allt ómögulegt en ég veit alveg að ég get þetta, þarf bara að beita miklum aga á sjálfa mig og taka þetta með trompi, mig langar ekki að vera um 100 kg og ef ég myndi taka upp fyrra líferni þá færi talan fljótt hækkandi, það þýðir því ekkert annað en að taka í taumana og hrista þetta spik af sér :d Dagurinn á morgun verður vonandi betri en þessi og þá verður sko bara horft á björtu hliðarnar

Enginn 500 "kall" fokinn enn

Fri, 14 Mar 2008 00:11:39 GMT

Þetta hefur allt gengið vel, þó ég verði nú að segja að nammiþörfin sagði mikið til sín í dag. Ég fór í heimsókn í kvöld og húsráðandinn skellti nammi í skál og beint fyrir framan mig á borðið, á tímabili var ég að hugsa um að fá mér en hugsaði svo með mér að ég ætlaði sko ekki að fara að borga 500 kr fyrir einn mola, ónei. Sem betur fer sátu tveir nammigrísir einnig við borðið og áður en ég vissi af voru þeir búnir úr skálinni og ég þurfti ekki að horfa á þetta nammi lengi :d En ég sem sagt stalst ekki í nammi.
næsta mánudag er ég búin að vera tvær vikur án þess að fá mér nammi og mér finnst alveg ótrúlegt að mér hafi tekist að halda þetta svona lengi út.
ég fór í bónus í dag og sá þar öll páskaeggin og mig langaði svo að kaupa mér páskaegg nr 7 og skella því öllu í mig í einu en það hefur ekkert upp úr sér nema vanlíðan og aukakíló.
Ég hef alltaf verið of þung, frá því að ég var barn og því á ég alveg ofboðslega auðvelt með að bæta á mig kílóum og erfitt að ná þeim af en þeir sem fitna þegar komið er á fullorðinsaldurinn eiga auðveldara með að ná þessu af og halda þessu þannig. en ég ætla nú samt að klára þetta dæmi og halda því :)

Dagurinn í gær...

Tue, 11 Mar 2008 10:29:23 GMT

....gekk vel í alla staði. Ekkert svindl og fór í ræktina og tók á því, brenndi í gær og tók svo fætur í morgun :d
Ég er mikið að hugsa um að verðlauna sjálfri mér þegar aukakílóin eru farin og skella mér í verslunarferð erlendis, maður verður nú að fá sér ný föt þegar maður minnkar :haha:
Maður sparar líka svo mikið á því að vera ekki að kaupa sér nammi, þvílíkur peningur sem fór bara í ruslfæði en það er nú liðin tíð.
Páskarnir nálgast óðum og ég hef ákveðið að fá mér ekki páskaegg þetta árið, hef bara ekki gott af því.
Jæja, þetta er gott í bili, leyfi ykkur að fylgjast með áfram :)

Nýjar tölur og helgin afstaðin

Mon, 10 Mar 2008 13:38:49 GMT

Já ég er bara mjög ánægð með árangurinn seinustu viku. Ekkert nammi og 2,4 kg farin. Auðvitað var eitthvað af þessu uppsafnaður vökvi en á meðan vigtin fer niður en ekki upp að þá er ég sátt.
Helgi gekk vel, ekkert svindl í gangi :d Fór í ræktina á laugardaginn en hvíldi svo í gær. Ætla svo að skella mér á eftir. Ég fór á American Style í gær en ætlaði nú ekki að fara að fá mér franskar og fékk mér því bara nautasteik og bakaða kartöflu og var það mjög gott.
Í þessu átaki mínu er ég samt sem áður að borða allan mat en vil þó helst ekki fá mér franskar. En allur svona venjulegur matur fer á minn disk, það sem ég geri samt er að borða sem hollast, borða oftar og minna í einu og sleppa alveg nammi, ís, gosi og kökum.
En núna er bara að halda þessu áfram, taka þessa viku eins og seinustu. Læt ykkur vita hvernig gengur ;)